លោកឧត្តមសេនីយ៍ទោ សិទ្ធិ ឡោះ ដឹកនាំប្រជុំបូកសរុបសភាពការណ៍លទ្ធផលប្រតិបត្តិការប្រចាំខែមករា ឆ្នាំ២០២៥ និងផ្សព្វផ្សាយផែនការ ការពារសន្តិសុខ សណ្តាប់ធ្នាប់សាធារណៈ សុវត្ថិភាពសង្គម

បន្ទាយមានជ័យ៖ នៅព្រឹកថ្ងៃចន្ទ ទី២០ ខែមករា ឆ្នាំ២០២៥ លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ បានអញ្ជើញដឹកនាំកិច្ចប្រជុំបូកសរុបសភាពការណ៍លទ្ធផលប្រតិបត្តិការប្រចាំខែមករា ឆ្នាំ២០២៥ និង ផ្សព្វផ្សាយផែនការ ការពារសន្តិសុខ សណ្តាប់ធ្នាប់សាធារណៈ សុវត្ថិភាពសង្គម ក្នុងឱកាសបុណ្យចូលឆ្នាំ ប្រពៃណីប្រជាជនចិន និងវៀតណាម ដល់កងកម្លាំងនគរបាលក្រោមឱវាទ។

លោកឧត្តមសេនីយ៍ត្រី រ៉ែម វីរះ ស្នងការរង ផែនការងារសេនាធិការ បានឡើងរាយការណ៍អំពីលទ្ធផល ប្រតិបត្តិការប្រចាំខែមករា ឆ្នាំ២០២៥ (គិតពីថ្ងៃទី២០ ខែធ្នូ ឆ្នាំ២០២៤ ដល់ ថ្ងៃទី១៩ ខែមករា ឆ្នាំ២០២៥) និងដាក់ចេញទិសដៅអនុវត្តការងារសម្រាប់ខែបន្ទាប់ និងផ្សព្វផ្សាយផែនការ ការពារសន្តិសុខ សណ្តាប់ធ្នាប់សាធារណៈ សុវត្ថិភាពសង្គម ក្នុងឱកាសបុណ្យចូលឆ្នាំប្រពៃណីប្រជាជនចិន និងវៀតណាម។

លោកឧត្តមសេនីយ៍ទោ សិទ្ធិ ឡោះ ស្នងការដ្ឋាននគរបាលខេត្តបន្ទាយមានជ័យ បានដាក់ចេញផែនការយ៉ាងម៉ឺងម៉ាត់ ដល់កងកម្លាំងទាំងអស់ត្រូវពង្រឹងការគ្រប់គ្រងកម្លាំង បន្តផ្សព្វផ្សាយគោលនយោបាយភូមិ ឃុំ សង្កាត់ មានសុវត្ថិភាព ពង្រឹងការ ការពារសន្តិសុខ សណ្តាប់ធ្នាប់សាធារណៈ សុវត្ថិភាពសង្គមឱ្យបានល្អ ទប់ស្កាត់បទល្មើសគ្រប់ប្រភេទ និងក្មេងទំនើងឱ្យមានប្រសិទ្ធភាព។

លោកឧត្តមសេនីយ៍ទោស្នងការ បានជំរុញដល់កងកម្លាំងទាំងអស់ត្រូវពង្រឹងគ្រប់គ្រងកម្លាំងប្រចាំការ២៤ម៉ោង ការស្នាក់នៅរបស់ជនបរទេស ឬគ្រឿងផ្ទុះផ្សេងៗគ្មានច្បាប់អនុញ្ញាត ពង្រឹងការផ្តល់សេវាសាធារណៈជូនប្រជាពលរដ្ឋឱ្យបានទាន់ពេលវេលា ពង្រឹងគ្រប់គ្រងអាវុធគ្រឿងផ្ទុះ ត្រូវទប់ស្កាត់ឱ្យបានការលួចដុតកាំជ្រួច ផាវ ក្នុងឱកាសបុណ្យចូលឆ្នាំចិន និងវៀតណាម៕

ប្រភព៖ ស្នងការដ្ឋាននគរបាលខេត្តបន្ទាយមានជ័យ