លោកឧត្តមសេនីយ៍ទោ សម្បត្តិ សុធារដ្ឋ ដឹកនាំកិច្ចប្រជុំត្រួតពិនិត្យលទ្ធផលការងារប្រចាំខែមករា និងលើកទិសដៅការងារខែបន្ទាប់ ឆ្នាំ២០២៥

កែប៖ នៅសាលប្រជុំធំស្នងការដ្ឋាននគរបាលខេត្តកែប មានរៀបចំកិច្ចប្រជុំ ត្រួតពិនិត្យសភាពការណ៍លទ្ធផលការងារប្រចាំខែមករា និងលើកទិសដៅ ខែកុម្ភៈ ឆ្នាំ២០២៥ និងផ្សព្វផ្សាយផែនការ ការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ក្នុងពិធីបុណ្យចូលឆ្នាំថ្មីប្រពៃណីជនជាតិ ចិន វៀតណាម នាពេលឆាប់ៗខាងមុខនេះ នារសៀលថ្ងៃចន្ទ ទី២០ ខែមករា ឆ្នាំ២០២៥។

កិច្ចប្រជុំនេះស្ថិតក្រោមអធិបតីភាពលោកឧត្តមសេនីយ៍ទោ សម្បត្តិ សុធារដ្ឋ ស្នងការ នៃស្នងការដ្ឋាននគរបាលខេត្តកែប ដដោយមានការអញ្ជើញចូលរួមពីលោក លោកស្រីឧត្តមសេនីយ៍ វរសេនីយ៍ ស្នងការរងទាំងអស់ នាយ នាយរងការិយាល័យជំនាញ អធិការ អធិការរងនគរបាលក្រុង ស្រុកទាំងពីរ ប្រធានក្រុមចំរុះនគរបាលខេត្តចុះប្រចាំការគ្រប់ក្រុម ប្រធានក្រុមអន្តរាគមន៍ទាំង៣ក្រុម និងនាយប៉ុស្តិ៍នគរបាលរដ្ឋបាលទាំង៥ ឃុំ សង្កាត់ សរុបចំនួន ១៣៥នាក់។ 

អង្គប្រជុំក៏បានស្តាប់របាយការណ៍បូកសរុបស្តីពីលទ្ធផលការងារប្រចាំខែមករា ឆ្នាំ២០២៥ ដែលអានដោយ លោកវរសេនីយ៍ឯក អ៊ូច កុម្ភៈ នាយការិយាល័យសរុបផែនការ ផ្សព្វផ្សាយផែនការ ការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ក្នុងពិធីបុណ្យចូលឆ្នាំថ្មីប្រពៃណីជនជាតិ ចិន វៀតណាម និងការចូលរួមយោបល់ពីបណ្តាសមាជិកអង្គប្រជុំផងដែរ។

លោកឧត្តមសេនីយ៍ទោ សម្បត្តិ សុធារដ្ឋ ស្នងការនគរបាលខេត្ត បានមានប្រសាសន៍វាយតម្លៃខ្ពស់ចំពោះសកម្មភាពការងាររបស់កងកម្លាំងនៃស្នងការដ្ឋាននគរបាលខេត្តកែប ទាំងអស់ ដែលកន្លងមកបានអនុវត្តការងារយ៉ាងសកម្មឈរលើស្មារតីទទួលខុសត្រូវខ្ពស់ ក្នុងការរក្សាស្ថេរភាពនយោបាយ សន្តិសុខ សណ្ដាប់ធ្នាប់សង្គម បង្ការទប់ស្កាត់រាល់បទល្មើសនានាដែលកើតមានក្នុងភូមិសាស្ត្រខេត្តកែប គួរឱ្យមានមោទកៈភាព។ 

លោកឧត្តមសេនីយ៍ទោ ស្នងការនគរបាលខេត្ត ក៏បានដាក់ចេញនូវផែនការយុទ្ធសាស្ត្រមួយចំនួន ព្រមទាំងណែនាំដល់គ្រប់បណ្ដាអង្គភាពជំនាញ នៃស្នងការដ្ឋាននគរបាលខេត្តកែប ទាំងអស់ត្រូវបង្កើនការយកចិត្តទុកដាក់អនុវត្តឱ្យបានម៉ឺងម៉ាត់នូវគោលការណ៍ ផែនការនិងបទបញ្ជាណែនាំរបស់ប្រមុខរាជរដ្ឋាភិបាល ក្រសួងមហាផ្ទៃ អគ្គស្នងការដ្ឋាននគរបាលជាតិ និងគណបញ្ជាការឯកភាពខេត្ត ដែលបានប្រគល់ជូនក្នុងការរក្សាសន្តិសុខ សណ្តាប់ធ្នាប់សង្គម និងសុវត្ថិភាពសាធារណៈជូនបងប្អូនប្រជាពលរដ្ឋ ភ្ញៀវទេសចរណ៍ជាតិ អន្តរជាតិ ដែលអញ្ជើញចូលមកសម្រាកកម្សាន្ត នាឱកាសបុណ្យចូលឆ្នាំថ្មីប្រពៃណីជនជាតិចិន វៀតណាម ឱ្យទទួលបានសុវត្ថិភាពល្អតាមការរំពឹងទុក និងត្រូវបំផុសការចូលរួមអនុវត្តគោលនយោបាយភូមិ ឃុំ សង្កាត់មានសុវត្ថិភាព ឱ្យបានផុលផុស បង្ការទប់ស្កាត់ បង្រ្កាបបទល្មើសផ្សេងៗឱ្យបានទាន់ពេលវេលា ពិសេសបទល្មើសលួច ឆក់ ប្លន់ គ្រឿងញៀន និងក្មេងទំនើង៕

ប្រភព៖ ស្នងការដ្ឋាននគរបាលខេត្តកែប