លោកឧត្តមសេនីយ៍ទោ ហេង សុផល ដឹកនាំកងកម្លាំងចុះត្រួតពិនិត្យភូមិសាស្រ្ត តាមដងផ្លូវជាតិលេខ ៦ ដែលប្រឈម នឹងគ្រោះថ្នាក់ចរាចរណ៍

កំពង់ធំ៖ ថ្ងៃទី ២០ ខែ មករា ឆ្នាំ២០២៥ លោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ បានដឹកនាំកងកម្លាំងចុះត្រួតពិនិត្យភូមិសាស្រ្ត តាមដងផ្លូវជាតិលេខ៦ ដែលប្រឈម នឹងគ្រោះថ្នាក់ចរាចរណ៍ ចាប់ពីព្រំប្រទល់ខេត្ត ក្នុងស្រុកតាំងគោក រហូតដល់ក្រុងស្ទឹងសែន ។លោកឧត្តមសេនីយ៍ទោ ហេង សុផល ស្នងការនគរបាលខេត្ត បានថ្លែងឱ្យដឹងថា ការចុះត្រួតពិនិត្យតាមបណ្ដាគោលដៅសំខាន់ៗខាងលើនេះ គឺដើម្បីដោះស្រាយបញ្ហាប្រឈម ដែលអាចកើតមានឡើងនូវគ្រោះថ្នាក់ ជាយថាហេតុ និងបង្ការ ទប់ស្កាត់ កាត់បន្ថយគ្រោះថ្នាក់ចរាចរណ៍ ឱ្យមានកម្រិតទាប ក្នុងគោលបំណងថែរក្សាបាន អាយុ ជីវិត ទ្រព្យសម្បត្តិ។ គ្រោះថ្នាក់ចរាចរណ៍ បានបំផ្លិចបំផ្លាញ អាយុជីវិត ទ្រព្យសម្បត្តិ រុញច្រានជីវភាពគ្រួសារ ឱ្យធ្លាក់ចូលក្នុងជីវភាពក្រីក្រ បន្សល់ទុក ជនពិការ បុរសពោះម៉ាយ ស្ត្រីមេម៉ាយ កូនកំព្រា បាត់បង់អនាគត។

សូមបញ្ជាក់ដែរថា រយៈពេលកន្លងមក លោកឧត្តមសេនីយ៍ទោស្នងការ បានដាក់ចេញបទបញ្ជាយ៉ាងម៉ឺងម៉ាត់ ដល់មន្ត្រីជំនាញ កម្លាំងអធិការនគរបាល នៃដ្ឋាននគរបាលក្រុង-ស្រុក និងកម្លាំងប៉ុស្តិ៍នគរបាលរដ្ឋបាល ត្រូវ ៖

១-បង្កើនការផ្សព្វផ្សាយច្បាប់ចរាចរណ៍ផ្លូវគោក ដល់សិស្សានុសិស្ស បងប្អូនប្រជាពលរដ្ឋ គ្រប់ស្រទាប់វណ្ណៈ ឱ្យមានការចូលរួមអនុវត្តច្បាប់ចរាចរណ៍ផ្លូវគោក បានព្រមៗគ្នា ដើម្បីកាត់បន្ថយ ហានិភ័យ ដែលកើតឡើង ពីគ្រោះថ្នាក់ចរាចរណ៍ ។

២- បញ្ចុះកងកម្លាំងជួយសម្រួលចរាចរណ៍ ជូនសិស្សានុសិស្ស ចេញពីសាលារៀន និងអ្នកធ្វើដំណើរតាមទីប្រជុំជន ផងដែរ ៕

ប្រភព៖ ស្នងការដ្ឋាននគរបាលខេត្តកំពង់ធំ